ԼԻԼԻԹ ՊՈՂՈՍՅԱՆԸ ԵԳԻՊՏՈՍԻ ՄԻՋԱԶԳԱՅԻՆ ՄՐՑԱՇԱՐՈՒՄ ԴԱՐՁԱՎ ԲՐՈՆԶԵ ՄԵԴԱԼԱԿԻՐ

Հոկտեմբերի 25-ից 28-ը Եգիպտոսի մայրաքաղաք Կահիրեում կայացավ Եգիպտոսի 2018 թ. միջազգային մրցաշարը, որն անցկացվում էր տղամարդկանց, կանանց մեղախաղում, ինչպես նաև տղամարդկանց, կանանց զուգախաղում և խառը զուգախաղում: Այն անցկացվում էր արդեն չորրորդ անգամ: Մրցանակային ֆոնդը կազմում էր 10.000 ԱՄՆ դոլար: Հայաստանը ներկայացնող Լիլիթ Պողոսյանը տպավորիչ խաղ ցուցադրեց և ազգությամբ մալթացի Մեթյու Աբելայի հետ խառը զուգախաղում գրավեց երրորդ հորիզոնականը: Առաջին խաղում զույգը հաղթանակ տարավ Եգիպտոսը ներկայացնող Մահմուդ Մահմուդ / Ջանա Աշրաֆ զույգի նկատմամբ: Ցավոք, կիսաեզրափակչում հորդանանցի զույգը կասեցրեց նրանց հաղթարշավը ու Պողոսյան/ Աբելա զույգը բավարարվեց միայն երրորդ հորիզոնականով: Այնուամենայնիվ, այս խաղում ևս նրանք արժանի դիմադրություն ցույց տվեցին ու երկրորդ սեթում հասան առավելության՝ 21-19 հաշվով: